La 24-an de Novembro, 2007 en Roterdamo, Nederlando, kiu estas tutmonda ĉefurbo de Esperanto pro tie situanta Centra Oficejo de Universala Esperanto-Asocio, okazis jam la 27-a Malferma Tago. Ĝin partoprenis 110 esperantistoj el 18 landoj. El Litovio la aranĝon partoprenis Povilas JEGOROVAS kaj Jevgenij GAUS el Kaunas kaj nun en Bruselo loĝanta Diemante ANICIENE. Ĉefpreleganto de la Tago estis konata Esperanto-historiisto d-ro Ulrich LINS. Jevgenij GAUS kun sia kolego Peter BALAZ el Slovakio prezentis multajn ĝisnunajn kaj estontajn projektojn de la grupo E@I, ĉefe planatan retan informportalon pri Esperanto en multaj lingvoj. Sekva Malferma Tago okazos sabaton, la 26-an de Aprilo, 2008 kaj estos dediĉita al la 100-a datreveno de la fondo de UEA. Pli detale pri la lasta Malferma Tago legu en Gazetaraj Komunikoj de UEA Nr.272 (2007.11.30).

Sekvan tagon, la 25-an de Novembro, 2007 en Centra Oficejo de UEA okazis Seminario pri informado organizita de nova ĝenerala sekretario de UEA kaj estrarano pri informado Barbara PIETRZAK. Partoprenis ĉirkaŭ 20 interesiĝantoj pri la temo el kelkaj najbaraj landoj. El Litovio partoprenis Povilas JEGOROVAS kaj Jevgenij GAUS. Intervenis Barbara PIETRZAK, Ziko van DIJK, Andrej GRIGORJEVSKIJ. Jevgenij GAUS kaj Peter BALAZ parolis kiamaniere E@I per siaj novaj projektoj povas helpi en la informa laboro de UEA. Seminario finiĝis per konkludaj diskutoj.

Povilas JEGOROVAS