La 14-an de Junio, 2010 en Klaipeda post longa malsano en sia 93-a vivojaro forpasis multjara kaj aktiva esperantisto Viktoras BANIULAITIS ( 1917.08.04 - 2010.06.14, ). Li naskighis en Ukrainio, sed estante 4-jara jam loghis en Litovio. Lau profesio li estis ingheniero. Pri Esperanto li ekinteresighis jam antau la dua mondmilito, sed efektive lingvon lernis en 1966 en Klaipeda kaj tuj alighis al tiutempa Esperanto-rondeto. En 1968 kune kun aliaj aktivuloj li fondis Esperanto-klubon en Klaipeda, kiu dum jardekoj estis modela Esperanto-klubo en Litovio - dum multaj jaroj li estis sekretario de la klubo , dum kelkaj - prezidanto. Viktoras BANIULAITIS estis organizanto de tiutempaj tritagaj chiujaraj Esperanto-tendaretoj en Giruliai apud Klaipeda chiusomere. Li partoprenis multajn BET-ojn ( Baltiajn Esperanto-Tendarojn ) kaj estis cheforganizanto de kelkaj. Li chiam havis multajn eksterlandajn kontaktojn, multe korespondis, estis peranto de kelkaj Esperanto-gazetoj kaj revuoj, Dum 1989-1996 li estis peranto de SAT por ekssovetiaj landoj, poste por Baltiaj landoj kaj fine nur por Litovio.Li estis arda kolektanto de diversaj esperantajhoj kaj havis valorajn kolektojn de insignoj kaj aliaj esperantajhoj. Viktoras BANIUL:AITIS ankau gvidis Esperanto-kursojn - dum 1970-1973 liajn kursojn finis pli ol 150 personoj.Krom Esperanto, li havis ankau alian pasion - shakon, kiun li bonege ludis mem kaj ankau estis grava organizanto de shakistoj en Klaipeda. Dum lastaj jaroj pro malbonighinta sanstato li jam ne povis partopreni Esperanto-agadon. Lau lia volo tradicia funebra entombiga ceremonio ne okazos - li estas kremaciita. Litovaj esperantistoj memoros lin kiel simplan kaj mildan homon kaj forte konvinkitan esperantiston. Ni kune funebras kaj kondolencas liajn familianojn, parencojn kaj proksimulojn.
Povilas JEGOROVAS
Prezidanto de Litova Esperanto-Asocio |
|
